Koffie?

[Meraai vannie Baai]

Dankie vir die koffie Anton. Dit is nou 6.17 Sondagaand diekant van die aardbol. Weet julle, ons is werklik geseend om so in die kuberruim te kan kuier. Adele dankie mater, ek het kom skep vanuit die mandjie. Anastasia, ek het my amper verbeel ek ruik jou Sondagkos. Soos ek nou net iewers geskryf het, die ouvrou gaan nou in die kooi kruip met Outop se pilletjie (tablet) en vir my 'n mooi fliek soek om te geniet. Hy kyk onder in die grot na 'n skop-skiet-gedoente, so ek hou verby. Nie gebou vir sulke dinge nie 

[Anton Louw]

"3km vanaf die Wild Coast Sun"

Ek weet baie goed waar dit ongeveer is.    Laat my dink aan 'n ware storie, toe ek en ouboet as jong verlorenes die land getoer het met rugsakke.  Ons was oppad Durban toe, noordwaarts geryloop na 'n week by Grahamstad se kunstefees.   Geen geld nie, dood honger wetend dat daar 'n maaltyd wag in Durban by vriende se huis.

So met die ryloop tel 2 Indiers in 'n bakkie ons op.  Ons 2 agterop, saam met een groot pynappel! 

Hulle stop toe juis daar by die Wild Coast Sun om seker die kele te gaan nat maak en geluk probeer by die slotmasjiene?  Ek en broer agter op die bakkie moes maar sit en wag, met water in ons ou army waterbottels, saam met die groot pynappel.

Die pynappel het nie lank gehou nie, en die soet sap was die skuld gevoel die moeite werd, of was dit?

Nou ja, soos die storie loop, nadat die 2 Indiers klaar is met hulle dinge by die Casino, was dit toe weer verder Noordwaarts, met nog net een stop - en ek het gewonder hoekom hulle met 'n oop bakkie ry sonder vrag?

Sowaar!  Pynappel plantasies.   Laat ek dit so stel, ons het baie pynappels verslind daardie dag, maar die pynappel wat ek nooit sal vergeet nie is die een wat ons by die Wild Coast sun geeet het. (-:

....  ons het toe by Durban uitgekom, saam met 'n vrag vol pynappels.

[Anastasia]

Lekker lees ek aan die vertelling nou!  Ja, ons het 'n pragtige plekkie geseend gewees om te bekom met ons ou pensioengeldjie.  Beide ek en manlief was al ons jare lank in die onderwys, en het altyd hier kom vakansie hou.  Elke liewe vakansie gery en na huise gekyk, en gedroom (al het ons gedink dis 'n onbekombare droom, met onderwys salarisse soos dit was).  Met aftree het ons styf oge toegeknyp en die sprong gewaag.  Ons geniet dit hier, veral die plek van ons, absoluut ongerep en eenkant.  Maar, daar is mos maar altyd 'n slang in die paradys.  Ons het so nege maande gelede wonderlik ontkom van 'n nare 'home invasion'.  Maar ons laat nie toe om verdryf te word nie.  Groot gat in ons spaargeldjie later, is dit nou 'n Fort Knox.  En hoop ons maar vir die beste. 

Ken die pynappels van hier se kant.  Dis 'n ander pynappel as enige ander.  Ek kook ook so aan die kant konfyte en chutneys, en pryk dit op al die klein padstalletjies en winkeltjies hier op die soom langs die kus se rakke.  My pynappel konfyt is uiters gewild.  As jy die prop oopmaak gryp daardie geur jou vas aan die neusvleuels!  Wens ek kon met julle almal deel.

[Anton Louw]

"was al ons jare lank in die onderwys"

Laat my nou wonder?   Was julle Afrikaanse onderwysers? 

Naas, as jy hier lees.   Was jy Afrikaanse onderwyser op HTS?

[Naas]

Ek het tekeninge en kuns en kultuur gegee. Is tans engineer dosent by Westcoast College.


 

[adele]

As mens nie dadelik iets kan antwoord nie, dan vergeet ek. Anastasia, iewers het jy gevra wat ek doen ... skuus ek antwoord sommer nou hier. Nee, al het ek voor my eerste troue verpleeg, is ek nie daar nie. Ek is assistentbestuurder by 'n vakansie-oord in die Vrystaat, langs Aldam. Ons is deel van Vrystaat dept Toerisme.

[Anton Louw]

"vakansie-oord in die Vrystaat,"

Wat is die naam van die plek Adele?

[adele]

Willem Pretorius-oord ... moet net nie daaroor opgewonde raak nie 
 Ons is nog deel van die wildreservaat om die dam.

[PM]

Hier kom ek ook nou aangehuppel.  Ons internet was drupsgewys die naweek.  Wanneer dit langnaweek is word die plekkie oorval met naweekgangers en ek reken dit is al die kinders wat rekenaarspeletjies speel.
Dit gaan my verstand te bowe dat mense van die stad af kom om hier tussen die diere en die natuur te kuier en die kinders sit in die huis, die hele naweek!  Die afkoppiegenerasie. 

Ek hoop julle het almal 'n wonderlike naweek gehad. 

[Meraai vannie Baai]

En op hierdie kuierende noot, kom ek vanaand vir eers groet. Daar is nog koffie in die kan en 'n lekseltjie room, as jy vinnig spring is daar dalk nog twee of drie van die skons oor 



 

[PM]

Ek gryp gou enetjie!  Dankie lief matertjie.  Geniet jou aand en lekker slap. 

[adele]

Dit gaan my verstand te bowe dat mense van die stad af kom om hier tussen die diere en die natuur te kuier en die kinders sit in die huis, die hele naweek!  Die afkoppiegenerasie ......    Mense vra baie wat hulle hier kan kom doen, wel, nie veel as jy nie hou van die natuur en diere nie ... net swembad en visvang. En kan die kinders kla?

En dan, ja, die ander 'generasie' (kom ons noem hulle maar so)    hulle weet van onkapabel drink, sommer al so hier aankom, baklei, eis, beskuldig as ons reëls probeer toepas ... o ja, hulle is meesters daarin .... staan agter die deur en soek ons ook daar. En dan musiek, ons is o.a. teenaan die wildreservaat. twv om mekaar as besoekers te konsidereer, het ons nie musiek toegelaat nie, tot  sekere mense ons met 'n hengse bohaai by ons hoofkantoor verkla het, nou los ons alle mense, laat hul doen wat hul wil, musiek ingesluit. He he, toe baklei van hulle groepe eendag en kom verkla mekaar, want elke groep se musiek pla die ander. Ons het 'n dowe oor gedraai. As jy gekonsidereer wil word, pas dit ook teenoor ander toe .... dan nie?

Hier het ons dieselfde ondervindinge, PM, besige tye is ons internet baie swak, en met die groot privaatvakansie-oord langs ons, staan ons geen kans oor langnaweke en piektye nie.

[PM]

Ja, dit is regtig onaangenaam.  Gelukkig is ons sekuriteit baie kwaai en as iemand hom nie kan gedra nie word hy van die plaas af verwyder.  Dit is relatief stil en rustig.  Gelukkig het ons nie daardie ander generasie hier by ons nie. 
Die internet wat so stadig is, is werklik 'n irritasie.

[Anastasia]

Hier antwoord ek almal nou so van 'n luisie (pun intended) op 'n punt af:

Adel, dankie en interessant.  Ek het as kleine dogtertjie van 5 my alie afgeval by die Willem Pretorius vakansie oord!  Letterlik!

Anton, nee, my man was Geografie onnie, maar laaste jare hoof en adjunkhoof.  Ek het Engels doseer.  Ek is 'n Afrikaanse Griek wat Engels gegee het.  Lekker lag ek.  Ek skryf gemakliker in Engels, vandaar sal jy sien op die blad waar ek gedigte plaas, dat baie in Engels is.

Meraai, jou koffie lyk alte heerlik!  ek sit graag aan!

PM, dis die milleniums.  Net hulle ma's kan hulle liefhê!

[PM]

Ek stem saam met jou Anastasia.  As 'n mamma haar bosbokkie melk gee en jy stel nie belang om te kom kyk nie, hoort jy nie in die bos nie.