Kankerbehandelings - wat jou nie altyd vertel word nie

[PM]

Raaitjie, ek wil graag weet hoe gaan dit met jou sus. 

[Meraai vannie Baai]

Liefste Adele, ek verstaan een honderd persent wat jy so opreg bedoel omdat jy hierdie paadjie self gestap het. Ek het juis vandag vir haar 'n boodskap gestuur dat dit okay is om te se 'ek is NIE okay nie'. Sy hoef nie sterk te wees terwille van almal wat haar so oneinding lief het nie.

Dierbare forummamma, sy sou gister dalk huistoe kon gaan. Hulle het nou die twee wonde wat infeksie gekry het, verbind met mekaar deur dit oop te sny en skoon te maak. Die VAC pomp doen sy werk en dit is die beste wat hulle vir haar kon doen onder omstandighede.

Ons het 'n foto gesien wat die dokters geneem het van haar wond en het letterlik die hele nag omgehuil. As ek hierdie kruis vir haar kon dra sou ek nie een sekond gehuiwer het nie maar sy stap hom alleen. Haar geloof dra haar deur. Dankie maters vir julle omgee. Ons waardeer opreg. Ek dra elke keer julle omgee oor aan haar.

[PM]

Jieeeesssss.  Ek huil saam met jou my sustertjie.  Dit is so moeilik.  Ek glo dat dit die magteloosheid is wat 'n mens onder kry.  Jy kan  maar net toekyk en niks daaraan doen nie.  Tog is julle onophoudelike ondersteuning vir haar goud werd en dit dra haar deur.  Moenie moed verloor nie.  Ons dink almal aan julle.   

[PM]

Ek het 'n voeltjie hoor fluit dat Die Afrikaanseforum vir ons matertjie 'n ruikertjie gestuur het, met liefde.  Ons hoop almal dat dit haar sal opvrolik.  Sy behoort dit vandag nog te kry. 

[Meraai vannie Baai]

My sus is in vervoering. PM, jy is die beste forummoeder. Kyk wat is vandag afgelewer!





Ons as familie wil opregte dank bring vir julle omgee  Ek sluip gou weer terug om te vertel my sussatjie het glo gese hierdie pragtige geskenk het gekom asof Gestuur. Sy raak nou 0-vol vir die situasie siestog en dit was nou net wat sy nodig gehad het! PM, jy wou ietsie stuur om haar op te beur. Dit het gewerk!!

[PM]

Ag dit lyk pragtig.  Ek is bly sy voel 'n laggie vir 'n slaggie.      Dankie tog vir 'n afleweringsdiens, anders sou dit nie gou gebeur het nie.   

[Meraai vannie Baai]

Wil gou die volgende deel wat ek raakgelees het:

Die algemeenste soorte kanker en die waarskuwingstekens:

Niemelanoom-velkanker is die algemeenste vorm van kanker en tas jaarliks miljoene mense aan. Die waarskuwingstekens sluit onder meer in sere wat nie genees nie, of genees en dan weer verskyn, verhewe en skubberige rooi kolle of klein, blink, gladde knoppies wat pienk, rooi of wit is.

Melanoomvelkanker se waarskuwingstekens is ʼn moesie of merk op die vel wat ongelyke rande het,  ʼn moesie wat groter is as die punt van ʼn potlooduitveër, ʼn moesie wat vinnig groei of van kleur of vorm verander, of ʼn moesie wat bloei of jeuk.

Borskanker Daar word ook jaarliks honderde duisende nuwe gevalle van borskanker aangemeld. Die waarskuwingstekens sluit in ʼn nuwe knop of massa in die bors, swelling in die bors, verdikking, rooiheid of skubberigheid van die vel op die bors, pyn in jou bors of tepel en tepelafskeiding wat nie borsmelk is nie.

Longkanker is wêreldwyd een van die algemeenste soorte kanker onder mans. Die waarskuwingstekens sluit onder meer in ʼn aanhoudende hoes wat mettertyd erger word, die hoes van bloed, kortasemrigheid, konstante borspyn en gereelde longinfeksies. Longkanker veroorsaak gewoonlik nie simptome voordat dit gevorderd is nie.

Prostaatkanker se waarskuwingstekens sluit onder meer in probleme om te urineer, veranderinge in ejakulasie, bloed in die urien of ejakulaat, pyn in die lae rug, dye, heupe of bekkenarea en druk of pyn in die rektum.

Kolon- en rektale kanker se waarskuwingstekens sluit onder meer in gewigsverlies, swakheid en uitputting, verandering in dermgewoontes, langdurige pyn die maag, druk in die rektum of buik en bloed in die stoelgang.

Bronne

Die Nasionale Kankerinstituut https://www.cancer.gov/

WebMD: https://www.webmd.com/cancer/cancer-a-to-z  en https://www.webmd.com/cancer/medical-reference/default.htm

Kansa: https://www.cansa.org.za/files/2015/01/CANSA-CancerCare-Booklet-AFR-Jan-2015.pdf

[PM]

Dankie vir die aandra matertjie.  Dit is altyd goed om voorbedag te wees. 

[Meraai vannie Baai]

Dit gaan nie goed met my ou sussatjie nie. Hulle gaan vandag die penne wat in haar heup en been geplant is uithaal. Haar liggaam het dit verwerp en is blykbaar die rede vir die absesse wat aanmekaar vorm. Die wonde se skoonmaak is 'n nagmerrie sniksnik. Sy is so moedige ou vegtertjie. Ek het Sondag 'n bietjie met haar gesels oor die foon en kon hoor sy is gedaan. Soveel pyn al beleef. Die lewe is hard en wreed. Vra nie meer vrae nie want daar is nie antwoorde nie. 

Update 21/11/18 Bloedtoets wys daar 2 lelike goggas in my sus se bloed wat nie reageer op antibiotika nie 

[PM]

Baie sterkte vir haar en vir julle Raaitjie.  Dit is die magteloosheid wat so aan 'n mens kou.  Ek hoop dit gaan al beter met haar.  Daar is nie woorde wat kan troos nie.  Hier is 'n drukkie vir elkeen van julle. 

[Meraai vannie Baai]

Baie dankie matertjie. Opregte waardering van ons almal. Nie een van ons kan die nut insien van penne inplant en dan weer moet uithaal nie. Sny op sny op sny en dit terwyl haar wonde letterlik vrot word want dit heg nie 

[PM]

Ek kan my nie eers die pyn en lyding indink nie.  Dit moet verskriklik wees.      

[Meraai vannie Baai]

Ai PM, ons het nie meer woorde nie. Net trane. Haar wonde is gister weer in die teater skoongemaak.

Hoeveel kan een mens verduur voor jy oorgee? Hierdie sussatjie van my is een van die gelowigste mensies wat ek ken en het tot nou toe nog NET goed gedoen aan ander en haar lewe is loutere hel op aarde. Almal bid en bid en bid en sy word net sieker en sieker en sieker.

Die verloop van die harde wrede werklikheid ne. Laat ek liewers swyg.

[Meraai vannie Baai]

10 Maande later kan ek dankbaar kom getuig dat hierdie brawe sustertjie van my teruggeveg het met alles in haar. Sy ontvang nog steeds behandeling maar spog reeds met 'n pragtige bos hare en 'n sprankel in haar menswees wat verstande te bowe gaan.

Opregte dank vir elkeen wat saam ons op hierdie ongenadige pad gestap het tot nou toe. Ek deel graag 'n skakel op FB waar sy vertel hoe 'wonderneut' haar gehelp het met herstel.

 https://www.facebook.com/joey.mans.5/videos/2393303087423169/

 

[adele]

Wat 'n wonnnnderlike woord is dit nie, ek is sooo oneindig dankbaar, ongelooflik om haar so pragtig te sien