ná milde reën

[adele]

ek stap ná milde reën
langs velde vol vygies
wat toevou wanneer als
binne jou verdonker
maar juigend oopmaak
uitsprei in malse kleurespel
wanneer sonlig jou hart omarm
liefde jou wese vul
oor die vaal damwal stort
en wegvloei om elkeen
wat jou sfeer binnekom
langs jou lewe aan te raak

©adéle theron

[Meraai vannie Baai]

Liefste mater ek gaan hierdie pragtige bydrae van jou ook uitstal by ons praatverse 
Dit sluit nou aan by die wat ek reeds van jou geleen het:
http://forum.afrikaanseforum.co.za/index.php?topic=4338.msg29605#msg29605

[PM]

en loop ek vandag in die kwekery en sien die "malse kleurespel" van die vygies, hoog in die blom en ek weet, my matertjie weet van woorde, van gevoelens, van karakter.  Hierdie forum van ons sal so arm wees sonder jou!  Dankie dat jy deel lief Adele. 

[adele]

Liewe vriendinne... Julle ondersteuning onder my arms is so gereeld voorop in my gedagtes 

[PM]

Dit kom uit die hart uit lief Vriendin.   

[adele]

Dankie baaaaie, ek weet en waardeer dit soooo baie.
Nog so klein stukkie prosa met groot nuus wat na al die jare na my kant toe gekom het.... My prosa vir VLU vir vanjaar het op die area konferensie begin van die jaar 4de gekom, maar is deur na verlede week se streekskongres in Bloemfontein waar ek eerste plek gekry het. Nou gaan dit deur na die SA byeenkoms in Pretoria.    my vorige beste in Bloemfontein was 4de.plek.

Maar weer wys dit dat as ek ook dun nerfies gehad het, ek nooit daar sou kom nie, want met geen naskoolse Afrikaanse studies of skryfopleiding nie, kom als wat ek weet van julle groep af, van Woes se dae al.

[Naas]

 

 

[PM]

Baie geluk Adele.  Jy is 'n ster.  Enige ou kan toe-oog sien hoe ongelooflik jou werk gegroei het.  Die Vroue Landbou Unie doen goed vir kuns in die algemeen.  Dit is net jammer dat hulle op die agtergrond is hier in die stede. 

[adele]

Maar stede-vroue kan mos nie landbou nie 

[adele]

O ja, ek wou nog byvoeg dat Jaco Jacobs nie weet wie is ek nie, maar ek weet wie is hy en ek dink die wêreld van sy uitstekende kinderboeke. Hy was die beoordelaar van ons prosa in Bloemfontein  vir hom.

[PM]

Is daar 'n kans dat ons ook jou prosa te siene kan kry?
Dit is goed dat die beoordeellaars jou nie ken nie.  Dit  maak net seker dat jy op eie meriete (verdienste) gewen het. 

[adele]

Ek sal probeer onthou om dit te kom plaas na afloop van alles. Dan mag ek mos  Al kry ek daar die minste punte, sal ek darem weet iemand het dit goed geag 

Dis nogal baie verwarrend wanneer elke beoordelaar se emosies en gevoelens van die volgende verskil. Dis dieselfde met enige iets wat nie soos 2+2=4 presiese puntetellings kry nie. Naaldwerk-items of gebak en konfyt, foto's of skilderye en blommerangskikkings kan ook nie alles in elke persoon se smaak val nie. Daarom moet spelling en sins/paragraaf-konstruksie ten minste perfek wees, al verskil jou storie hemelsbreed van 'n ander s'n.

[PM]

Jy laat my nou dink aan die seun wat baie ongelukkig was omdat hy nie 'n plek in die resies gewen het nie.  Sy pa sê toe vir hom dat die belangrikste was dat hy aan die resies deelgeneem het en dit voltooi het. 
Ons sal geduldig wag, soos Raaitjie seg, ek boek my plek! 

[PM]

Hier sit en wag ek nog steeds!  Kom deel dit met ons asseblief Adele.  Asseblief!

[adele]

Liewe vriendin, ek het nog nie weer kans gehad vir inloer nie, vanoggend was die eerste keer. Ek was so rukkie uit aksie maar kom nou by. Ek het in pretoria 84% vir daai prosa gekry. Ek gaan die nou kom plaas. Dankie baie vir julle ondersteuning