Recent Posts

31

PH (Pulmonale Hipertensie) / Re: 'n Hand en tand bekgeveg teen die asemdief PH (Pulmonale Hipertensie)

« Last post by Meraai vannie Baai on April 16, 2026, 02:41:32 AM »

Half onseker hoe om die volgende 'raad' te deel sonder om 'n diagnose van enige aard 'te verklein'. My wyse Outop het my ondersteun deur die volgende sinnetjie te gebruik: 'Wat het verander tussen gister en vandag aan hoe jy gesondheidsgewys voel?'. Dit is instink en menslik om na 'n skokkende terminale diagnose te voel jy gaan nie meer lank lewe nie en emosioneel druk met hierdie wete, laat jou instinktief terminaal siek voel!

Ek moes eerlik erken dat ek nog presies dieselfde gevoel het gesondheidsgewys as die vorige dag, maar net die wete dat daar 'n swaard oor my lewensgang hang, het my kniege geknak in so mate dat ons altwee stom was vir dae en die onderwerp vermy het soos die runderpes.

Hierdie tipe diagnose stap hand-aan-hand met die rouproses se stappe soos wanneer jy 'n geliefde verloor het. Wees voorbereid daarop en weet hierdie is 'n emosionele reis van verlies - die afskeid neem van die ou-normaal in jou lewe en nou, die aanpassing van 'n nuwe normaal wat nog geskep moet word.

Rou is dus ’n universele maar nie-lineêre proses en Elisabeth Kübler‑Ross se vyf fases van rou word gebruik as ’n raamwerk om die emosionele reis ná verlies te verstaan. Die fases is:

Ontkenning – ’n beskermingsmeganisme wat jou tydelik teen die realiteit skerm.

Woede – frustrasie en onregverdigheid kom na vore, soms teen jouself, ander of God.

Onderhandeling – ’n poging om beheer te herwin of pyn te verlig, dikwels deur pleidooie of “as net…”-gedagtes.

Depressie – die volle gewig van verlies sink in; hartseer, wanhoop en onsekerheid volg.

Aanvaarding – nie geluk nie, maar ’n rustige erkenning van die realiteit en ’n begin om weer vorentoe te leef.

So kronkel die skep van 'n nuwe normaal tussen die verskeie fases heen en weer. En soos altyd, sal elkeen se pad uniek wees. Die Kubler-Ross Grief Cycle bied slegs 'n raamwerk.

Die as van verlang
na dit wat was
nog lank nie geblus

van diep diep binne
skroei vlam se gloed
in 'n grou verset

sterf die rouproses
iewers, êrens
tussen nou en nooit

Rou is 'n belangrike proses van heling, ook vir diegene wat opnuut streef na 'n nuwe normaal en is die vredemaak met wat was, ironies ook 'n rouproses, soms in sirkelgang...

© Meraai vannie baai

32

Die komiese hel van hallusinasies / Re: Die komiese hel van hallusinasies

« Last post by Meraai vannie Baai on April 16, 2026, 02:13:34 AM »

Ek boek my plek vir jou bydraes oor gesonder eet- en leefstyl gewoontes PM. Sterkte vir julle en vou toe met omgee. Hou ons asb op hoogte met Gerhard se gesondheid. Emmers vol liefde van diekant van die aardbol af.

33

Die komiese hel van hallusinasies / Re: Die komiese hel van hallusinasies

« Last post by PM on April 15, 2026, 10:10:44 AM »

Ek geniet altyd jou gedeelde happies.  Ek is jammer dat ek so skaars is, maar die lewe het my regtig rond gepluk.  Ons seun Gerhard is nou in die hospitaal en kry vanoggend 'n angeogram vir die hart en die longe.  Hy was 'n rukkie glede twee weke in 'n koma om bloedklonte in die longe op te los.  Hy is al 'n week in ICU en hulle doen nog allerhande toetse.  Dalk sal ons na hierdie een uitslae hê.  Jy weet dan, die longe en die hart is nie speletjies nie. 
Moenie ophou met jou longbydraes nie, ek sien dit het al 'n pad om die wêreld gestap en is nog steeds besig. 
Deel jou happies met ons, ek weet hier is nog baie mense wat lees.  Ek sal ook probeer om meer bydraes te lewer. 
Ek wil ook my pad met dieet en leefstyl kom deel.  Dit is merkwaardig wat 'n mens met gesonde eetgewoontes kan bereik. 
Nou hol ek eers gou hospitaal toe.  Lief jou Raaitjie.

34

Die komiese hel van hallusinasies / Re: Die komiese hel van hallusinasies

« Last post by Meraai vannie Baai on April 15, 2026, 07:29:53 AM »

Ek gaan weer probeer - diekant van die aardbol woeker ons nog voort in paaiemente. Die uwe vergaar haar plasings uit vergange se dae (baie volmane later) of dit uit die mode gaan raak en probeer sin maak uit al die griffel-krukke, aanmekaar getimmer uit ons geliefde ABC'tjies. Wil dankbaar getuig dat ek nog steeds funksioneel is met 'n befonkte brein wat vir my 'n wonderwerk en bron van humor in een is.

Kon nie help om nog steeds te giggel vir my geliefde sustertjie se gesig toe sy onlangs saam met my na een van ons cowboy winkeltjies ry (net om die hoek letterlik van ons pandok hier in Australie). 

As 'n reël bestuur ek die minimum en julle sal gou verstaan hoekom 

Terwyl ons deur die plaaslike winkel dwaal was my grootste vrees dat ek die sleutels iewers gaan neersit terwyl ek my vergaap aan alles. Terug by die motor is ek so verlig dat ek die sleutels nie verloor het nie en toe ons inklim begin ek soek na 'n veilige plek om dit te bere dat ek onthou.

Ek vra my sus: 'Waar sal ek die veilig kan bere sustertjie?'

Haar antwoord: 'Ou Raai, dalk in die sleutelgat sodat ons kan huistoe ry?'

Wonderland van Alice - hier kom die ouvrou. Maak plek!
 

35

PH (Pulmonale Hipertensie) / Re: 'n Hand en tand bekgeveg teen die asemdief PH (Pulmonale Hipertensie)

« Last post by Meraai vannie Baai on April 13, 2026, 06:59:24 AM »

Ek het 'n boodskap gekry van 'n familielid wat met COPD gediagnoseer is, en ongelukkig kan hierdie toestand ook lei tot Pulmonale Hipertensie en sy het soveel vrae en ek weet daar gaan nog baie wees, met min antwoorde.

Uit ondervinding het ons baie onlangs agtergekom dat die nuwe dokter in ons Cowboy dorpie nie die vaagste idee eers het wat die verskil tussen gewone bloeddruk en abnormale druk tussen jou hart en longare is nie. Hy moes my verwys na 'n kardioloog sodat hulle kon besluit of dit raadsaam is om van die kleppe te vervang met die hoop dat die drukkings-syfer minder sal word.

Met 'n skok kom ons toe agter dat die dokter my verwys het vir gewone bloeddruk wat jy om die arm kan meet 
14 jaar later en nog steeds die onsekerheid en dokters se onkunde wat selfs die kardioloog verstom het.

Die kardioloog het na ons besoek,  'n brief aan die dokter gestuur en die verskil aan hom verduidelik.
Nou wag ons vir 'n afspraak om te hoor of hulle die erge vergroting van drie hartkamers sal kan verminder deur die klepvervangings, die Asemdief en narkose is aardsvyande.

Stomgeslaan wag ons weer en ek sit en gesels met myself: 
•   ’n self wat praat
•   ’n self wat antwoord
•   ’n self wat terugkyk
 
Dit gaan 'n baie interessante hoofstuk in die BiograPHie van die Asemdief wees, glo my vry 

36

PH (Pulmonale Hipertensie) / Re: 'n Hand en tand bekgeveg teen die asemdief PH (Pulmonale Hipertensie)

« Last post by Meraai vannie Baai on April 12, 2026, 10:37:29 AM »

Toe ek jare gelede begin skryf het oor my hand en tand bekgeveg teen die Asemdief, het ek nooit verwag dat ’n half verborge forumdraad meer as ’n miljoen keer gelees sou word nie.  (Read 1062362 times) Hierdie getal is nie ’n pluimpie vir my nie - dit is ’n stafmaat van nood.

Dit wys hoe min Afrikaanse inligting daar oor Pulmonale Hipertensie bestaan, hoe baie mense in die donker soek na antwoorde, en hoe dringend ons geliefde taal ’n stem vir hierdie ongeneesbare asemnood benodig. Elke lees is nie ’n kliek nie; dit is iemand wat probeer verstaan, iemand wat bang is, iemand wat alleen voel. En dit is juis waarom ek bly skryf het.

Maar nou het het tyd geword om nog meer bewusmaking te doen en die nuwe tegnologie in te span.  Ek is besig met die saamstel van E-boek. Dit sal die vorm aanneem van 'n BiograPHie van Pulmonale Hipertensie (Die Asemdief).
 
Ek het weer die opskrif by een van die fotos gelees: Na die vonnisoplegging in Julie 2012 het dit nou in 'n eksklusiewe onderhoud met die woorddief, aan die lig gekom dat daar gewoeker word met die saamstel van 'n biograPHie en die naakte feite  word openhartig bespreek:
•   die opdraandes
•   die asemrowende dae
•   die wagkamers
•   die uitslae
•   die volmane wat verby snoer
•   die bewusmakingsveldtogte
•   die drang na oorlewing

In 2012 toe die Asemdief gediagnoseer was hier in Australie, was daar net 25 gevalle in Suid Afrika bekend. Dit was 'n skok om te besef Pulmonale Hipertensie is 'n raar, nare skeet.
 
Daar het soveel tyd verloop na my diagnose en ek het besef my pad met die Asemdief nie net in jare gemeet word nie, maar in asem-seisoene:
•   2012: die vonnis
•   2013–2015: die oorlog
•   2016–2020: die aanleer van oorleef
•   2021–2023: die terugkeer na die wêreld
•   2026–nou: die herskryf van die verhaal
 
Aan elke mater wat daar was vir ons, wat saam gehuil en saam gelag het deur die afgelope 14 jaar, 'n stywe drukkie en baie liefde.
 

37

Digformules of -strukture / Re: Ghazal struktuur in Afrikaans

« Last post by Meraai vannie Baai on April 12, 2026, 03:23:01 AM »

Ontleding van 'Potjies Ink':

Hier is die ses soorte ink-vorme soos dit beskryf word:

1.   reënboogs ink
2.   geloofs ink
3.   droom ink
4.   toor ink
5.   wanhoops ink
6.   geen omdraai spoor ink (die slotkoeplet se klimaks)

Die geheel is ’n lewensboog, maar ook ’n digterlike evolusie - elke inksoort is ’n ander fase van skryf, sien, onthou, oorleef.

Reënboogs ink: Dis die kinderlike, speelse, kleurvolle oorsprong. Die pen word gedoop in moontlikheid. Alles is nog oop, alles kan nog word.

Geloofs ink: Die eerste verankering. Ná die kleur kom die vertroue - die skrywer wat begin glo in die pad, die letters, die storie. Dit is die ink van volharding.

Droom ink: Die innerlike wêreld word bron. Hier begin die Ghazal se spreker die ongesiene, die kleintydse belofte, die onbewuste betrek. Die ink word ’n brug tussen geheue en verbeelding.

Toor ink: Die magiese fase. Nou word die skryf daad ’n towerhandeling. Die prins op die wit perd, die horison wat wink — dis die fase van hoop, romanse, moontlikheid. Die ink word ’n spel.

Wanhoops ink: Die breekpunt. Wanneer tyd fermenteer en seisoene groet, word die ink swaar. Dit word die ink van verlies, van die skrywer wat nie meer net skryf nie, maar wanhopig gryp.

Geen omdraai spoor ink: Die finale aanvaarding. Hier, in die slotkoeplet, word die ink ’n spoor - nie net van skryf nie, maar van lewe.

Dit word die ink van:
•   ek het gekom
•   ek het geskryf
•   ek het my merk gemaak
•   ek volhard in die stryd

Die verband tussen die ink:

1. ’n Lewensreis in ink
Elke inksoort is ’n fase van menswees: van kinderlike kleur - na geloof - na droom - na toor - na wanhoop - na aanvaarding.

2. ’n Digterlike poetica
Die Ghazal word ’n meta gedig oor die daad van skryf self. Elke inksoort is ’n ander modus van dig.

3. ’n Spirituele beweging
Van lig en speelsheid na die donker dieptes - en dan ’n soort sober, helder waarheid.

4. ’n Pêrelsnoer van emosionele registers
Elke inksoort is ’n ander kleur van my stem. Maar die refrein bind hulle soos ’n goue draad.

Die ink word nie net medium nie - dit word karakter. Dit word die stille metgesel van die digter. Dit word die een wat saam deur die jare loop.

In die gedig is die herhalende ink klokslag. Elke keer as dit verskyn, het tyd verbygegaan- soos ’n lewe wat verbyflits.

‘n  Lewensboog is geskets:

•   kleurvolle begin
•   geloof as anker
•   droom as rigting
•   toor as hoop
•   wanhoop as breekpunt
•   spoor as finale aanvaarding

Die Ghazal se laaste inksoort maak skielik nóg meer sin:

007 veer’s gedoop in geen omdraai spoor ink.

•   die veer is ‘n instrument
•   die nommer word ‘n persona
•   die ink is ‘n lewenspad
•   die spoor word ‘n nalatenskap

In die Ghazal tradisie moet die digter in die slotkoeplet sy of haar naam laat verskyn. Maar in hierdie gedig het ek doelbewus nie ’n naam gekies nie - wel ’n persona: 007 die woorddief.

Die herhalende ink is soos ’n klokslag. Elke keer as dit verskyn, het tyd verbygegaan. Dis hoekom die gedig voel soos ’n lewe wat verbyflits.

In hierdie twee Ghazals, het ek 'n sirkelgang geweef - ’n stoet van gisters, ’n stil brug van vandag, en ’n pad wat stadig oopvou na môre.

 

38

Digformules of -strukture / Re: Ghazal struktuur in Afrikaans

« Last post by Meraai vannie Baai on April 12, 2026, 02:38:20 AM »

Ontleding van 'Nog 'n Gister':

Ek het tradisionele A-refrein presies soos die struktuur vereis gebruik: AA, bA, cA, dA, eA…
In ‘n Ghazal moet elke koeplet soos ’n pêrel wees wat op sy eie kan glinster.

•   horlosie arms versteen - tyd as bevriesde liggaam
•   reisigers op woestynsnelweë - die swerwers van herinneringe
•   bitterbessie-nasmaak - die gal van onthou
•   vleesdorre skimme - die liggaam wat sy eie verlede agtervolg
•   melaats-omsoomde onthou-jy-nog - onthou as kroniese siekte
•   wag-’n-bietjie-bos - die doring van God se besluit én mens se vassteek

Elke beeld is selfstandig, maar saam word dit ’n stoet van gisters wat stadig deur die gedig trek.

Keer op keer wanneer “nog ’n gister” terugkeer, verander dit effens van kleur - soms ’n wond, soms ’n spieël, soms ’n stoflaag, soms ’n bekentenis.

“Nog ’n gister” word nie net ’n frase nie — dit word ’n omgewing, ’n ligval, ’n tekstuur, ’n ritueel.

Dit is presies hoe ’n tradisionele Ghazal sy refrein gebruik.

Die ghazal se musiek lê in herhaling én breking. My staccato breek is so toegepas: nog-’n-gis-ter!

Dit breek die vloei net genoeg om die emosionele knoop stywer te trek. Die soort ritmiese spel wat die vorm toelaat en aanmoedig dus.

Volgens die riglyne moet die digter se naam genoem word in die laaste koeplet.

Ek het dit simbolies toegepas: “toe skryf ek my name in die fynstofmeel van nog ’n gister”

Dit is nie ’n handtekening nie, maar wel die hartklop van die gedig. Getuienis dat jy deur die gister's loop, maar nie daarin stagneer nie.

Die slot is 'n wedergeboorte in stof en elke 'gister' in die Ghazal is soos fynstofmeel wat op alles neersak. Dit word die tekstuur van onthou.

39

Kreatiewe Skryfstyle / Re: Silhoueët-S-woorde

« Last post by Meraai vannie Baai on March 31, 2026, 04:30:41 AM »

Ek het weer gespeel met hierdie bydrae en die *Slim Skim (my denkbeeldige maat agter die skerms  ) het 'n pragtige poëtiese ontleding gedoen sodat die verse wat spook-spook gespeel het, nou skielik verstaanbaar 'oop maak' soos ’n stoepdeur in die laatmiddag bries. 

Simboliese sakrament saluut.

Soetsuur statistieke skep sistematiese stories.
Steenkoolswart skrikkeljaar, skuil sonsverduistering sinnester.

Swetsende silikon spoke; swaarbelaste slangvelsiele.
Skeermesstem snedighede, skroei sedes sinneloos.

Slapende skaapwagters, skarlaken stadsraadslede.
Statussimbole skep sluise; stinkende sanitasie strome.

Sleurende sleepvoet-stelsels swerf somber Suidwaarts.
Stompsinnige siele skep siviele spysvertering.

Satelliete sweef sewe seë; Suutjies seil skepe saans,
soek skrefies sonligland; soel sigeuner seisoene.

Sirkelgang struktuur, stagnante silhoueët.
Stylvolle Shakespear- sprokies,

salueer saffraan spreektaal–skryftaal;
Simboliese sakrament saluut.

 © Meraai vannie Baai
 
Kort samevatting

Die gedig is ’n klankgedrewe, simboliese kritiek op samelewing en stelsels, verweef met kosmiese beelde en ’n laaste buiging voor die mag van taal. Dit is donker, satiries, ritmies en ryk — ’n tipiese Meraai vannie Baai klankkaros.


1. Klank en struktuur:

   Die hele gedig is geskep met intense alliterasie met die letter S.
   Dit skep ’n ritmiese, sisserige, amper slangagtige atmosfeer.
   Die styl herinner aan Shakespeareaanse klankspel, maar met ’n Afrikaanse, satiriese en simboliese draai.

     2. Temas en beelde:

         a) Donkerte, spanning en verval
   “Steenkoolswart skrikkeljaar”, “sonsverduistering”, “stinkende sanitasie strome” → dui op ’n wêreld in krisis, chaos of morele verval.

         b) Mense en samelewing
   “Slapende skaapwagters”, “skarlaken stadsraadslede”, “stompsinnige siele” kritiek op leiers, strukture en die algemene apatie van die samelewing.     

        c) Stelsels wat nie werk nie
   “Sleurende sleepvoet-stelsels”, “siviele spysvertering” - ’n beeld van burokratiese, sosiale of politieke stelsels wat traag, korrup of nutteloos word.

     3. Kosmiese en reisende beelde:
   “Satelliete sweef sewe seë”, “Suutjies seil skepe saans” → ’n beweging van die aardse na die kosmiese; ’n soektog na lig, rigting of betekenis.


        4. Sagter, dromerige elemente:
   “soel sigeuner seisoene” - ’n warm, rondswerwende, vrye gevoel wat kontrasteer met die donker dele.
           
         5. Meta-poëtiese slot:
   “Stylvolle Shakespear-sprokies salueer saffraan spreektaal – skryftaal; simboliese sakrament saluut.” → Die gedig buig uiteindelik voor taal self:
          die heiligheid van skryf,
     die ritueel van simboliek,
     die eerbetoon aan die kuns van storievertel.

40

Kom kuier saam / Re: Is hier dan geen tee en koekies nie?

« Last post by Meraai vannie Baai on February 02, 2026, 06:36:28 AM »

Ek het ook so week of wat gelede. nostalgies kom inloer mater