Viooltjies in die kombuis

[adele]

Hier is 'n winterkaros
om ons toe te kombers,
jou lyf kontoer
my teen jou vas-
elke legkaartronding
is gemaak om te pas
en die vlammetjie flikker
bo-aan die pit van ons kers.

Ek proe die soet-suur
van maande se onthou,
skil en kook en 'kênfroet'
emmers vol bitter ervarings,
en plant vreugdepitte
in die sierstruiklanings
waar ons 'n nuwe lewenstuiste
met geloofstene en hoop bou.

My kop op jou skouer
luister na 'n wonderverhaal,
ek weet dis ons begin
in die sinkdakhuis,
sonder 'n vrugtespens
met viooltjies in die kombuis,
wanneer jou hande
vir ewig om my ritme ronddwaal.

[Edelsteentjie]

Ek hou Baie hiervan. Wonderlike werkwoorde wat jy skep: Kontoer teen my vas ens. Ek sien daardie hele prentjie van geluk in eenvoud.

[PM]

Dit is pragtig.  Soms,  net soms dink ek dat dit juis die bitter ervarings is wat die soet van die lewe soveel soeter maak.   

[Naas]

Baie mooilees gedig.
Ek sien uit na nog.

[Meraai vannie Baai]

Boektoe woorde prag    Lank na ek opgehou lees het, het die beeldende woorde soos 'n winterkaros die kontoere van my siel omvou!!