Vir die mense wat my nie ken nie, ek is ‘n groot mens.
Ek is nie vet nie maar om doktersfooie te bespaar gaan ek en my maag saam wanneer ek doktersafsprake het. Wanneer ons saam is vertel daai dokter gereeld vir my dat ons ongesond is en dat ek van hom (dis nou die maag en nie die dokter nie) ontslae moet raak anders…. Maar hoe nou gemaak? Ek is soortvan geheg aan die aanhangsel van my. Ons het immers saam grootgeword.
Ek ry ook met hierdie klein karretjie wat ‘n baie goeie vriendin vir my so half gegee het omdat sy my finansiele verknorsing raakgesien het. (Daar is nog goeie mense in die wêreld) Soos ek sê, dis ‘n klein karretjie. Net so 3mm langer as ‘n setpil maar ek vrek oor die dingetjie en woerts oralster met hom heen.
Nou die dag op pad Kaapstad toe klim ek daar by Durbanweg se brug op die N1.
In die duik regoor J&B se golfakademie begin die probleme.
Ek het ook probeer golf speel op my dae maar ek dink hulle het daai sport die verkeerde naam gegee. Dit moes eerder “Moer-en-Soek” gewees het. By die golfakademie is dit darem lekker want jy kan hulle stokke huur en ‘n emmer vol balle koop. Dan kan jy daai balle almal wegslaan terwyl jy op een plek staan. Hulle stuur later ‘n man in ‘n traliekar om die balle te gaan soek. Dis nogal pret om hom te probeer raakslaan. Hulle het my egter hier verban want ek het ‘n volmaakte kolskoot gehad. Na sewentien oefenswaaie het ek die bal in die middel van die golfstok se kop geslaan. Ongelukkig het die kop op daai oomblik nie in die rigting van die skoonveld gewys nie en die bal het die man langs my getref. Ek sal nou nie tegnies raak nie maar as dit ‘n vrou was wat langs my gestaan het het ek haar mis geslaan. Dit is later medies bevestig dat die man nog kinders kon hê maar hulle sal almal blou oë hê tot aan die derde geslag na hom.
Maar ek dwaal nou af.
Soos ek gesê het, dis regoor die golfplek waar my probleme begin.
Blou ligte…
Die verkeerdekonstabel wys ek moet aftrek.
Wie? Ek? Vra ek met my vinger wat in die saag was vir hom.
Hy verstaan my verkeerd en raak rooi, klim op sy megafoon en saai uit soos oor Bokradio dat ek moet aftrek.
Ek trek af.
Hy vra my liksens. Bekyk dit. Loop om die setpil en kyk dat al sy ligte werk. Probeer die setpil rondstoot terwyl ek remtrap en handrem vastrek. Kyk die liksens voor oppie ruit.
Hy krap daar op ‘n stuk papier op ‘n aanklipbord en swaai die papier deur die venster.
“Wat’s dit die?” vra ek soos een wat nie kan lees nie.
“R100 omdat jy nie ‘n veiligheidsgordel dra nie.”
Ek verêre my daar vir die gedoente en pluk daai gordel daar oor my skouer en maak dit vas.
Nou is ek beduiweld... Aspris.
Trek daar weg, voet in die hoek. Hardloop deur die ratte en op 100km/h bereik setpil sy “cruising speed”
Toe ek Tygerberg se heuwel afry verminder ek aspris spoed na 80km/h om die ander bestuurders net so te irriteer soos ek voel.
Dit moes ek nie doen.
Agter my is daar ‘n lorrie.
Die bestuurder raak ongeduldig en blaas daai lorrie se toeter soos ‘n treinfluit in my ore.
Ek ry nog stadiger, draai my ruit af, steek my hand soos ‘n lugdraad in die lug waar hy dit mooi kan sien. En ek wys vir hom watter vinger ek in die saag gehad het.
Die verkeer maak oop en daai lorrie kom verby my.
Swaai voor my in.
Stop dood voor my.
Sy deur gaan oop en daar klim ‘n mens uit.
Hy is groot.
Die lorrie se perd lig eintlik toe hy uit is.
Hier kom moeilikheid met ‘n groot K.
Maar my pa het my geleer, “As daai ou jou wil boelie, slaan eerste en slaan hard. As hy daarna nog staan het jy ten minste ‘n hou ingekry.”
Ek vlieg dus uit die setpil uit, blaas my borskas op soos ‘n hoenderhaan in paartyd en loop daai ou tegemoet.
Hy steek vas.
Die volgende oomblik sit hy om en klim terug in daai lorrie asof my skoonma en haar hele familie op sy hakke is.
Ek is maar te bly hy het besluit om eerder te ry want ek het hoeka nie lus gevoel vir bloei vandag nie.
Ek draai om om ook maar te ry net om te sien my kar is weg.
“Tipies Kaap.” dink ek, “draai jou gat dan steel hulle jou kar.”
Dis toe dat ek agterkom ek het vergeet om my veiligheidsgordel los te maak en dra die motor soos ‘n knapsak op my rug.
