Oupa sê mos altyd: “Wanneer jy neus innie lug op die vosperd pronk vertrap jy ongesiens die lewe onder sy hoewe.”
Oom Hans bly op die plaas ‘Familie se moer’. Die plaas grens aan die Ka’sienou hoe my geld verdwyn. As jy op sy stoep sit hoor jy hoe die gelaaide dobbelstene roep. Klim oor die heining en jy word omsingel deur vriendelike eenarmrowers wat oopbek vir jou kredietkaart wag. Reg om elke greintjie vet uit hom uit te suig. Hulle klingelliggieliedjies sing “Trek nog een keer aan my arm dan maak ek dalk al jou drome waar.
Oom Hans lewe van oes tot oes. Kuier en onthaal sy vriende in Miekenos. Vergroot sy huis om beter te onthaal.
Op die dorp loop ek en Oupa vir Oom Frederick raak. Hy is op pad kerk toe om te gaan reëlings tref dat sy ouers se oorblyfsels in die muur van onthou by die kerk geplaas word. Dit was sy ma se laaste wens.
Hy vertel ons opgewonde oor die ekstra werk wat hy gekry. Hy kan na ure werk en naweke ook. Dit gaan soveel makliker wees om die bybetaling op sy ma se hospitaalkostes te maak en nou kan hy darem ook die nissie in die muur van onthou bekostig. Hy verduidelik ook dat hy net soveel naweke hoef te werk dan is die begrafnis se lening ook afbetaal. En, gaan hy opgewonde voort, as hy klaar al die geldjies betaal het wil hy sy ekstra werkie se geld spaar sodat hy darem sy vrou, wat so mooi na sy ma gekyk het, vir ‘n welverdiende vakansie kan vat.
Oupa wil weet waar hulle vakansie gaan hou.
“Nee wat”, sê Oom Frederick, “ons sal seker maar in die karavaanpark in die Baai ‘n tentjie gaan opslaan vir ‘n paar dae.”
“Wat sê Hans? Kan hy nie help nie?” wil Oupa weet.
“Nee Oom, Hans het maar sy eie probleme met die nuwe vrou en stiefkinders. Oom weet mos. Hulle het maar moeilik op die plaas. Hy is baie besig met die oesery en so aan. Ek wil hom nie verontrief nie. Gelukkig het ek nou die ekstra werkie en kan ek dit vir ons almal makliker maak.”
So groet ons en oom Frederick is vort na die kerk vir sy reëlings.
Op Pad Huis toe sing Oupa:
“O ek het ‘n perd
‘n blinkvosperd
En ek sukkel om hom te betaal.
Want die bank het gesê
As ek hom wil hê
Moet ek hom self betaal
Maar ek ry alleen op my perd,
My blinkvosperd
Want ander sal betaal.”
©