Almal ken al die variasies wat Rooikappie en kie oor die jare gekry het. Al die denkbare moderne euwels is al daarin vasgevat. Dalk is daar nog 'n paar wat ons kan omdraai en op ons samelewing van toepassing maak.
In die ou storie het die Leeu uit sy maag gelag toe die muis hom vertel dat hy hom sal help. Later, toe hy rêrig in die warm water is, het die kleine fyne muisie hom wraggies gehelp. Vandag sal die muis waarskynlik weer help, maar hy sal blerrie vinnig moet spore maak daarna as hy nie die leeu se peuselhappie wil word nie. In nog 'n moontlike variasie sal die leeu ewige vriendskap aan die muis belowe, maar net sodra die stof gaan lê het, nooit weer muis se gedagte kry nie, laat staan nog vir muis bystaan as hy hulp nodig het. Ek sien in my verbeelding 'n grynslag en belustige kyk in die leeu se oë.
Die boontjies wat Jan op die mark gekry het, sal heel waarskynlik nie groei nie. Indien dit wel wonder bo wonder groei, kan jy met heelwat sekerheid weet dat die goue eiers vervals is en dat die Reus aan een of ander bende behoort. Jan se ma is dalk die produk van huishoudelike geweld en sy pa sit in die tronk vir moord. Jan is 'n snotneus seuntjie met tikwalms in sy oë en die tekens van mishandeling op sy lyfie.
Die Keiser se nuwe klere het waarskynlik op die lughawe saam met sy ander bagasie weggeraak. Dis 'n internasionale skandaal en die plaaslike regering blameer die insident op apartheid. Was dit nie vir apartheid nie, sou die beamptes kon lees en dan sou die tas nie misplaas wees nie. Niemand noem dat genoemde beampte nooit skool gegaan het nie, want hy was een van die geïntimideerde stakers wat oral aan protesoptogte deelgeneem het.
Die heks van Hansie en Grietjie was die meesterbrein agter die sindikaat wat in kinderpornografie gespesialiseer het. Sy het kinders verkoop as seksslawe en ander onnoembare euwels. Hansie en Grietjie was moontlik spioene wat in opdrag van die FBI 'n lokval vir haar gestel het.
Ons bly in 'n siek samelewing as jy dink dat kinders van vandag eerder hierdie weergawe sal glo as die oorspronklike sprokie.
