Sand-spore

[Naas]

Ons more-strand se sand
lê maagdelik en wyd voor ons uit.
'n Spierwit reine skildersdoek
wat ons verfkwas-spore soek.
Plat, skoongevee
deur die lewens-see.

Op gister-strand se sand
slinger kruis en dwars nog vars
ons liefdes-spore hand in hand.
Speels getrap en baldadig
trippel-huppel hulle veerlig
in die vreugdes van gistraand.
   
In die nou-strand se sand
verf ons geduldig en onskuldig
met passie aan ons lewensdoek.
'n Meesterstuk.
'n Liefdes-skildery.
Saam-spore, ek en jy.

[Ah Willa]

dis 'n WOW!!  Ek kan amper hoor hoe die woorde gesing word ...

sjoe Naas, jy mag maar hoor!!  Dis 'n prag gedig!!

[PM]

'n Harde duidelike WOW!!! vir jou Naas.  Pragtig geskryf.

[Trapsoetjie]

Dis pragtige woorde.

Jy het 'n wonderlike manier om my vas te hou met jou woorde wanneer jy skryf. Wel praat ook..ha ha ha.

Wil amper sê "Well done"

[Naas]

Dankie julle.

[Naas]

Loer hier oor 'n gas se skouer en sien dat die forum se naweeksand onaangeroerd agter en voor my lê. Ek sal maar solank kringe in die sand hardloop.

[Meraai vannie Baai]

Jy bly 'n meester van strukture Naas