Dit was nou 'n funksie wat vir niks geskrik het nie. Almal het gehelp, meer as hulle deel gedoen en alles het seepglad verloop.
Baie dankie aan Hannes, jy weet mos wat jy gedoen het en baie dankie daarvoor, ook vir die op en af ry om alles bymekaar te kry, ek lief jou uit my hart uit. Geen ander mens op hierdie aarde sal soveel geduld met my hê nie.
Die klankstelsel was uitstekend. Baie dankie aan Kassie en Jaque wat dit so pragtig hanteer het. Kassie het toe sommer in 'n fotograaf ook verander, ons klikbek was moeg en het geweier om "uit te praat" natuurlik uit die Kaap uit! Dankie Kassie.
Arend het vir ons kom sing en almal het aan sy lippe gehang. Dit was so spesiaal!
Naas, ons seremoniemonster, het hom uitstekend gekwyt van sy taak. Ek is so bly ek het sulke vriende in hogere plekke!
Trappies het 'n borg gekry vir die wyn en dit was uitstekend. Dankie aan Ouma Trappies vir die moeite om dit te gaan haal, ons waardeer. Trappies se vleisborde was nie net 'n fees vir die oog nie, dit het verdwyn soos mis voor die son!
Die kaas en wyn, met heerlike druiwe en vye uit Lox se tuin, was 'n treffer in die oortreffende trap en die maalvleisbolletjies op stokkies met kaas en uitjies uit die hand van ons eie Ouma Naas was 'n treffer. Dan het sy nog die soet tuisgebak vir die koffie/teetafel ook voorsien en orals gehelp, tot laatnag.
Die saal wat Naas vir ons gereel het, het soos 'n handskoen gepas. Dit was ruim en "cosy" in dieselfde sin. Moeder Naas het vir ons die mooiste spierwit tafeldoeke voorsien en orals handjie bygesit. Baie dankie Moeder Naas. Baie dankie Vader Naas vir die glase en teekoppies wat jy gaan haal en weer more vandag, moet terug neem.
Elle het ook kaas voorsien en gesorg vir die neute met rosyne. Die pragtige gedagte om 'n kaartjie te koop en almal te vra om dit vir my te teken, die mooiste bos proteas, keurig verpak in mooipienk en ligte pienk sypapier, met die mooiste pienk raffia strikkies om, 'n stukkie van "die Kaap" wat ek kan huistoe neem om my aan hulle te laat dink, EN nog iets wat ek ongelooflik waardeer van haar, 'n geskenkie vir Magret, die werkesel. Dankie Elle, jy is 'n besonderse mens.
Sammy, ons klein Trappies, baie dankie vir die gevulde eiers en hulp. Dankie vir die uitnodigings en al die moeite wat jy gedoen het. Ek waardeer opreg. As ek nou nog 'n seun gehad het vir wie ek 'n skoondogter kon kies, sou dit beslis jy gewees het.
Vader Trappies, jy is so diep in my hart, Chris Barnard sou jou nie eers daar kon uitkry nie. Baie dankie vir al jou hulp en ondersteuning, ek waardeer.
Magret, wat alles moes inpak, afdra, uitpak, opdra, was en skoonmaak, tafels help skuif en tafels dek en jy noem dit en sy het dit gedoen. Magret, ek waardeer jou hulp geweldig baie. Almal wat onse Magret ontmoet het, weet hoekom ons so lief is vir haar.
Dankie, 'n groot dankie, aan al ons gaste. Sonder gaste kan 'n mens nie 'n byeenkoms hou nie.
Swak gedrag kan enige byeenkoms in 'n nagmerrie verander, maar ons het die pragtigste gaste gehad. Almal was stil, stemmig en rustig. Elkeen het my verseker dat hulle die aand geweldig baie geniet het en dat die kos uit die boonste rakke was.
Raaitjie, ongelukkig sal ek jou briefie, die een wat Naas voorgelees het, weer self moet lees. Halfpad deur het my hartsnare so geraas, ek het nie alles mooi ingeneem nie. Later weer meer kommentaar hieroor, maar wat ek baie duidelik onthou is dat Naas die mikrofoon aan Hannes oorhandig het met die woorde: Jy kan maar 'n paar woorde sê terwyl ek jou vrou gaan druk!
Sumier stap hy baie braaf tussen die tafels deur, tot daar heel agter waar ek gesit het, gryp my op en swaai my deur die lug en druk amper my ribbes af.
As daar iemand is wat ek gemis het om dankie te sê, skop ek my eie alie vol ou skoene!
Vir my was die aand baie spesiaal en volmaak. Dit was nog 'n groot vreugde om vir WW en Willa as gaste te hê.
Ek is gelukkig en het vrede in my hart.
Nou kan ek lekker gaan slaap. Kyk wat is die tyd! Die Kaap is nie vir sissies nie!
Vrede
jy is nou gedoop my kind
die geel slang langs Blouberg se strand
skitter in die nag
die branders wat so gedruis het
die wind wat so troosteloos gehuil het
het tot bedaring gekom
daar is vrede in my hart
stil my gemoed
hier sit ek
in die vroeë oggendure
en ek tel hulle
op my vingers
so een vir een
As 'n mens, uit die 12de verdieping, wanneer dit donker geword het, oor die hele strandpad uitkyk, lê die straatligte soos 'n geel slang, al kronkelend langs die kus.
Van onder af slaan die klank op en die gedruis van die see is intens. Hier bo kan die wind jou maklik van die balkon af waai as jy nie die "agterdeur" toe maak, voordat jy die "voordeur" oopmaak nie.
Soms is 'n mens se gemoed so weerbarstig soos die rowwe see en jy kerm en kla en skop teen die prikkels, soos die geloei van die wind. Dan, skielik, val alles in plek, en jy besef dat jy werklik geseend is en wat kry jy?
Vrede.
