Op die kusdorpie Spoelsloot, net anderkant Pramberg aan die noordkus van Suid-Afrika is daar ‘n restaurant wat daarop roem dat hulle enige eksotiese dis binne 90 minute kan berei en voorsit.
As jy hulle verkeed bewys wen jy ‘n Hummer met genoeg petrol in om die volgende dorp te haal.
Hier in die Kaap is daar ‘n fynproewer wat besluit hy gaan hulle aanvat op daardie breggerige aanspraak van hulle.
Hy vra toe ‘n vlieeniersvriend van hom om hom op sy volgende oorvlug daar uit te gooi met ‘n valskerm want hy wil nie met ‘n motor opgeskeep sit as hy die Hummer gewen het nie.
So gevra, so gemaak.
Die Vrydagaand net voor etenstyd val die ou toe ook daar uit en hy besoek sommer dadelik die restaurant nog voor hy by die gastehuis inboek.
Hy sit aan en bestel die volgende disse.
Voorgereg: Een Devil’s fork saamgestel uit sampioene gepluk teen die westerhang van die kranse van Dover.
Hoofgereg: Gebraaide Paddaboutjies uit die reënwoud van die Sahara en slakke uit die tuin van eden.
Nagereg: Groen vla uit Oostenryk.
Binne sestig minute word die stomende geregte vir hom voorgesit.
Die volgende dag, Saterdag, dink hy daaraan om bietjie meer eksoties te gaan en hy bestel.
Voorgereg: Emo vlerkies, diepgebraai in die olie van die Erike knolle uit Switserland.
Hoofgereg: Een draakeier geroerbraai saam met medium gaar lendesnit van ‘n eenhoring perd. Alles die saam met bloureis uit die Amazone rivier.
Nagereg: Indiese chokoladebier.
Hierdie keer neem dit sewentig minute voor die heerlike geregte en hul aromas aan hom voorgesit word.
Sondag middag besluit hy dis nou of nooit. Hy wil die middag nog met die Hummer vertrek sodat hy Dinsdag weer in die Kaap kan wees vir ‘n vergadering.
Hy bestel.
Voorgereg: Twee trolfrikkedelle toegedraai in biesies uit die nyl.
Hoofgereg: Die linkerbors van ‘n meermin, in skywe gesny en gaargemaak saam met eiervrug uit Rusland. Saam met dit Geposjeerde olywe uit Jerusalem. Alles dit bedien op twee sny varsgebakte brood met ystervarkvet.
Nagereg: “n lekker koppie parafienkoffie.
Tagtig minute later sien hy die kok hardloop nog benoud rond. Toe die 90 minute verstreke is kom die bestuurder van die restaurant na hom toe met die Hummer se sleutels. Vra nederig om verskoning omdat hulle nie sy bestelling kan uitvoer nie.
“Ek het geweet julle sal nie die linkersbors van ‘n meermin in die hande kon kry nie.” sê hy welvoldaan.
“Nee Meneer,” antwoord die bestuurder. “Op hierdie dorp van ons kry mens op ‘n Sondag nêrens vars brood te koop nie.”
