Uit ons vorige woordskuur: Posted Januarie 25th, 2009 by Meraai vannie baai.
Die reëls vir my 'tussen-in-trio struktuur' is eenvoudig:
* Jou gedig moet bestaan uit drie verse van vier reëls elk.
* Verse 1 en 3 se eerste drie reëls is dieselfde.
* Die titel is die derde reël van vers 1 en 3.
* Die middelste vers is 'n samevatting/uiteensetting van die onderwerp
en hierdie vers moet 'n rymvorm bevat.
Tussen in ...
En dit was aand
en dit was môre
tussen in ...
was daar vier seisoene;
pyn van baringsnood
baie vol ure.
(On)vervulde drome
en die dood.
En dit was aand
en dit was môre
tussen in ...
was ons lewe tussen vier mure.
© Meraai vannie baai
Hier is Oumatjie se weergawe van hierdie gedig-struktuur. Ek hou van die manier waarop sy verse 1 en 3 (i.p.v net die eerste drie reels dieselfde te maak) die hele vers herhaal het. Dit werk perfek met haar tema en titel!
Oumatjie: Maak ‘n foto
Verf met fyn kwashale
lig oor jou gesig.
Maak ‘n foto,
van ‘n oomblik se onthou…
Hierdie is jou sterwensuur -
weg is al jou vuur.
Maar jou lewensdrif,
tog nog altyd in my geheue gegrif…
Verf met fyn kwashale
lig oor jou gesig.
Maak ‘n foto,
van ‘n oomblik se onthou…
© Oumatjie
SueEe: Alles so onnodig vergete
Jou ou woordkulkunstenaar
vanuit jou verslonse gewete
alles so onnodig vergete
behalwe dié wat nog onhou
Vertel my; Wie hou agter
jou woorde die mag?
Gebruik jou verdoemde woorde sagter
en versteek die ontsettende krag
Jou ou woordkulkunstenaar
vanuit jou verslonse gewete
alles so onnodig vergete
behalwe dié wat nog veg, verbete
© SueEè
