Wasgoedmandjie Looks
Jy't my wêreld onderstebo kom draai
ja, jý
jy't my hart deurmekaar kom pluk
met jou stories oor kosmos en berg
oor veldplant en see…
nou vra jy hoekom lyk ek so verkreukeld!
dis dan jý wat soos 'n rukwind
om die hoek kom draai het
my byna teen 'n muur vas gewaai het
jý wat my kop laat tuimeldroër
en jy vra mý?
Laat ek jou sê hoekom
daar kreukels oor my lê,
ek soos 'n wasgoedmandjie lyk,
hoekom ek nag en dag omruil,
soos 'n warrelwind deur 'n stoppelland
sjwoesh! en oral stof opskop,
hande swaai soos 'n windmeul,
in 'n storm so stotterstom
met 'n mond vol tande vir jou kyk
Kom, laat ek jou vertel,
jy met jou ongeërgde houding
en jou ewige smile
jy wat soos sjokolade-mousse
op my tong kom lê
smaklekker smelt saam met my hart…
Nou luister nou mooi,
Mr Cool,
dis omdat jy my uitgeboul het
jy het my hart onderstebo kom keer het
daardie dag toe jy soos 'n rukwind
om die hoek kom waai het.
Kom ek vertel vir jou…
ek lief jou
(asof jy dit nie weet nie),
dis hoekom ek soos 'n wasgoedmandjie lyk
©Elsabé
