Hierdie resep het ek al met beesvleis en groente gemaak en al moet 'n mens die items vir twee dae in die kerriesous laat lê, is dit die moeite werd. Moet jou ook nie blind staar teen die baie soetigheid in die resep nie, dit is nie so soet soos dit klink nie.
Ek het vier hoenderborsies (in groterige stukke gesny)gebruik vir hierdie hoeveelheid marinade, het 8 stokkies gemaak. As jy meer wil maak moet jy die marinade se hoeveelheid aanpas.
Marinade:
Die hoender en ander groente wat gebruik word moet saam in die marinade lê. Die hoeveelheid en sterkte van die kerriepoeier hang van jouself af.
4 Hoogvol eetlkepels kerriepoeier
1 Teelepel Cayen peper.
1 Teelepel borrie
2 Groot uie in dik ringe gesny. (Jy kan dit ook klaar in groot blokke sny)
Een derde koppie chutney
Halwe koppie asyn
7 Eetlepels suiker
4 Eetlepels appelkooskonfyt
500 ml water
1 Eetlepel sout
1 Teelepel peper
Kook alles saam en gooi dit net so warm oor die hoenderblokkies, rooipeper, geelpeper, groenpeper, sampioene en enige ander groente wat jy op die stokkie wil ryg.
As jy lus is vir sukkel kan jy die stokkies ryg en die marinade lê en kort kort omdraai. Ek lê alles in die marinade en ryg die stokkies voor ek dit braai. Moenie te lank braai nie, onthou die marinade maak die vleis klaar halfpad gaar.
As jy dit wil vries moet jy nie ander items behalwe die uie en pepers inryg nie. Voeg 'n bietjie sous by en vries.
Lekker eet.
