Hier op Leeupoort loop die diere los tussen die huise deur.
Vakansie- en naweekgangers verstaan nie hoekom ons sulke streng reels het nie. Sommige mense dink die diere is mak omdat hulle mak voorkom. Wanneer 'n bok met 'n meter lange horings afbuk om iets te eet, moet jy darem weet, hy gaan sy kop optel en dan is jy in die pad as jy te naby is. Die naaste hospitaal is in Thabazimbi. 60 - 70 kilometer ver.
Diere het 'n dieet. Ons koop bokkos en lusern in die winter om die diere se voedsel aan te vul. Dit gaan na die "boswagter" toe en hy bepaal waar dit geplaas word. Bokke eet nie koek en brood nie.
Bobbejane in teendeel, eet enige ding wat hulle in die hande kan kry. Nou kom die besoekers en hulle voer die ape en bobbejane. More gaan hulle huis toe en hierdie diere breek in ons huise in om kos te kry. Glo my vry, hulle lig die skuifdeure uit om toegang te verkry. Jy kan nie waag om 'n venster of 'n deur oop te laat nie. As jy buite by die braaivleisvuur besig is, kan jy nie die kos vir 'n oomblik sonder toesig laat nie. Man, dit is lastig.
Ons was "vars uit die oond" hier in Leeupoort toe ons die oggend in die reservaat gaan ry het toe ons die oproep ontvang van 'n buurman: Die bobbejane is in julle huis!
Moeder, dit het ons drie dae geneem om die huis skoon te kry. Daardie is 'n reuk wat jou nagmerries gee, jou eetlus insluk vir tien dae. Jy gooi alles wat dalk nog eetbaar is weg. Hulle maak al die kaste oop en die yskaste en die kisvrieskas. Dit is 'n riller. Alles deurmekaar gegooi. Meel, eiers, botter, melk, vleis, konfyt, ag jy noem dit.
Hulle beskuie die hele plek. Ek moes al die gordyne afhaal en was, al die beddegoed. Die badkamermatjies en die ander matte op die vloere het ons sommer weggegooi.
'n Bobbejaan is 'n dom ding, hy weet waar hy ingekom het, maar wanneer dit uitgaantyd is het hy verdwaal. Jy moet bid dat dit nooit met jou gebeur nie, dit is wilder as die wildtuin. Ongelukkig is dit wat jy kry wanneer sommige vakansiegangers die diere voer.
Einde van deel een.
