Ek was vir my diensplig in die lugmag, het op die aanloopbane gewerk. Ons het eintlik aanloopbane gebou of herbou.
Ons was dus naby aan die vliegtuie wat opstyg en land.
Die mooiste vliegtuig klank vir my is 'n Shakleton wat vol gelaai is en opstyg. Daardie 4 X Rolls Royce 12 silinder motors wat elkeen 2455 perdekrag ( 1831 kW) gee met die klank van die dubbel propellers wat hard werk in die wind om die gewig van om en by 100 000 pond ( 43 000 kg) in die lug te kry.......daars net een ander klank wat so klink en dit is 'n ander Shakleton wat opstyg. As hy verby vlieg klink dit ook mooi maar die opstyg klank is die beste soos die lemme in die wind klief en die 48 silinders grom soos hulle als gee.
Ek het altyd gewonder hoe lyk die Shack binne in en Saterdag het ek die geleentheid gekry. Was erg verbaas toe dit 100% anders lyk as wat ek kon droom. Dit is nie juis 'n normale vliegtuig uitleg binne nie want die Shack is nie 'n normale vliegtuig nie.
Die vliegtuig het 13 "crew" gedra en sy maksimum vliegtyd was 24 ure aaneen in die lug. Die maksimum wat een van die suid afrikaanse Shacks gevlieg het sonder landing was tussen 21 en 22 uur.
Die romp is baie smal want dis nie 'n vrag of passasiers vliegtuig nie. Hier is 3 sitplekke en 5 slaap banke. Die vliegtuig het nie lugversorging nie en raak maar benoud binne in. Op die regterkant kan 'n wasbak gesien word en daar was 'n klein "grill" waarop hulle kon kos maak.
Nogal interessant die asbakkies by die sitplekke.
die vliegtuig is 28,19 meter lank en vlerk span van 36,52 meter.
Voor die slaapbanke is die radar operateurs se spasie(tjie) Hulle kon op so iets soos 250 seemyl 'n eiland in die see optel met die radar.
Nog vorentoe is die navigator se werkplek
Dan kry jy die 2 sitplekke van die vlieëniers waar jy tussen deur stap en afklim by 'n trappie.
Hoof vlieënier se sitplek. Glad nie maklik om daar in te klim en jou been ander kant die stuur stang te kry nie.
Op die volgende foto kan jy die een wat die bomme gegooi het se lê plek sien en hy het deur die bruin oranje glas gemik.
Hy het op 'n matras gelê. Bo hom het die kanonnier gesit wat 2 x 2mm kanonne beman het. In die vliegtuig is die gewere of kanonne uitgehaal. Die ruimte was maar vrek klein met glas weerskante en reg bo jou. Dit voel soos 'n "hot house." Geen lugversorging nie, en die kanonnier het nog 'n dik oranje oorpak aan gehad met helmet op die kop. Hulle het wel suurstof (lug?) masker gehad wat gehelp het met vars lug.
Hier bo steek iemand se bene uit wat in die beknopte ruimte sit. Daar was 'n deur agter die stoel wat toegemaak word en die persoon daar binne het nie juis beweeg ruimte nie.
agter die slaapbanke is nog 2 stoele wat ek nie afgeneem het nie. Weerskante van die vliegtuig romp was 'n patryspoort aan elke kant daar by die sitplekke wat die mense oopgemaak het om darem effens vars lug te kry. Ongelukkig vergeet om af te neem.
Verder agtertoe was die toilet en dan heel agter 'n matras met uitkyk plek om te sien of die bomme die teiken getref het. Hulle het darem nie net bomme gedra nie maar wel oorlewing voorraad ook en selfs rubberboot vir mense wat moeilikheid in die see het.
Hulle is gebou van in die jare 50 en die laaste een in Junie 1959.
Die uitsig agtertoe van die kanonnier se plek:
en wat die vlieënier sien wanneer hy links kyk
Die vragruim. Bomme en/of nood voorraad is hier in gehang en afgegooi wanneer nodig. Ons lugmag hy as ek reg onthou 4 reddings rubberbote gehad en een is verloor toe sy valskerm nie wou oopgaan nie.
Die 2 lemme agter mekaar, die een draai kloksgewys en die ander antikloksgewys. Die lemme se hoek is ook teenoorgestelde.
Pottie was 'n werktuigkundige op die Shacks. Ons het so bietjie met hom gesels. Hy was ook in die vliegtuig wat in die Sahara 'n noodlanding gemaak het.
nogal jammer ek kon nie heeldag met hom gesels nie. Ek glo hy het 'n arsenaal interessante stories oor die vliegtuie waarop hy seker 30 jaar gewerk het.
