Jakarandastad

[PM]

[PM]

[PM]

https://gewildstegedigte.litnet.co.za/

Skuus, maar ek het verdwaal tussen die lyne van mooi, mooier, mooiste. 

Ek het kom soek na Oktobermaand omdat die plantegroei so ongelooflik mooi is hierdie tyd van die jaar.  Alles blom en is vrolik.
Pretoria juig in kleure van pienk en pers.  Die jakarandas is in volle blom.  My Petria wiele waai die pers blommetjies die wêreld vol.  Die voeltjies sing en kwetter dat hoor en sien vergaan.  Dit is Oktobermaand. 

Viooltjies in die voorhuis –
Viooltjies blou en rooi!
Viooltjies orals op die veld,
En orals, ai, so mooi!
Dit is die maand Oktober,
die mooiste, mooiste maand
Dan is die dag so helder,
so groen is elke aand
So blou en sonder wolke
die hemel heerlik bo,
So blomtuin-vol van kleure
Die asvaal ou Karoo.
Dit is die maand Oktober!
Die varkblom is in bloei;
Oor al die seekoeigate
is kafferskuil gegroei;
Die koppies, kort gelede
nog soos ’n klip so kaal,
Het nou vir welkomsgroetnis
hul mooiste voorgehaal.
Dit is die maand Oktober!
Die akkerboom is groen;
Die bloekoms langs die paaie
is almal nuutgeboen;
En orals in die tuin rond
ruik jy sering en roos,
Jasmyn en katjiepiering,
lemoen en appelkoos.
Al was die dag soos yster
lank in die vuur gesteek,
Die varings in die klofies
deur hitte geel verbleek,
Tog, as die son daar onder
agter die berge gaan,
Dan word oor heel die wêreld
die mooiste geur geslaan.
Dit is die maand Oktober!
Die kokkewiet is uit;
Boomsingertjies en kriekies
Dié hoor jy orals fluit;
Fiskaal is op die oorlog –
daaronder by die sluis,
Daar is ’n dor ou doringboom
sy spens en sy kombuis.
Dit is die maand Oktober!
Ek dink die mense vier
Vir ewig in die hemel
Oktobermaand soos hier!
Wat wens jy meer as blomme,
as helder dag en nag?
Wat kan jy beter, mooier
Of heerliker verwag?
Ek is nog in Oktober!
My tuin is nog so groen,
So wit met al wat mooi is,
met bloeisels van lemoen,
So pragtig in die môre,
so heerlik in die aand
Ek is nog in Oktober,
die mooiste, mooiste maand
Wat gee ek om die winter?
Wat praat jy nou van Mei?
Wat skeel dit as ons later
weer donker dae kry?
Ek is nou in Oktober,
die mooiste, mooiste maand
Met elke dag so helder,
so pragtig elke aand
Viooltjies in die voorhuis,
Viooltjies blou en rooi!
Viooltjies orals op die veld,
En orals, ai, so mooi!