My offer

[Gawelina]

ek stuur vir jou
 'n bees se bulk, 'n skaap se blêr
 en paddas wat hul aandlied kwaak
 in 'n flessie saam gestoor
 
ek bring vir jou
 pronkertjies en rosegeur,
 lentebloeisels en vars nat grond

 in wierookstokkies vasgevang
 
ek wys vir jou
 'n bloedrooi newelwolk
 wat in die eerste sonstraal blink,
 sing saam met 'n goudgeel vink sy vreugdelied
 as hy vroegdag die son kom roep.
 
ek gee vir jou
 my offerliefde in 'n houtkom,
 sit dit saggies
 op jou altaartrappie neer.
 
ek wag vir jou antwoord
 in die fluister van die wind
 wyl luide eggo's van my hart
 jou naam in oormaat roep

[Fransi]

Pragtige offers. So mooi beeldend geskryf.

[PM]

Dit is 'n fees om te lees, my tone krul.  Dankie vir die deel Gawelientjie.  Dit is in jou boek.