Carol het met 'n voorstel gekom dat ons almal saam 'n bundel probeer skryf. Toe stel ek voor (16 Jun 2006) dat ons solank 'n oefenlopie aanpak: 'n Marathongedig as spanboupoging om Woes te boost en ons skrywers meer blootstelling te gee.
Sommer dadelik het ons die eerste drie verse ontvang net daar by die voorstel se kommentare en vandaar was die bal aan die rol en ons skryf in Afrikaans oor Afrikaans met die doel om die langste gedig in Afrikaans te skryf en die Engelse gedig se woordtelling verby te steek.
Willem het toe gevra dat ek die projekleier word en vir ons 'n erf geskep. Met klompie woesters wat elke week hulle gedigte vir my gestuur het, was dit 'n 12 weke spanpoging en ons het sukses behaal. Die Engelse rekord vir die langste gedig het 7,389 woorde en die Marathon-gedig het 8,828 woorde bereik!
Ek het die 6 temas gegee, wat al om die tweede week ingespan was. Al die gedigte wat ingestuur is, het ek probeer agtermekaar plaas sodat dit vloeiend lees. Soms was daar meer, en soms minder.
Die gedig sou baie langer gewees het as Willem my toegelaat het om al Louis Basson se gedigte oor sy liefde vir Afrikaans te plaas wat hy vir my goedgunstiglik toestemming gegee het, maar Willem se voorwaarde was dat die gedigte spesifiek vir die marathon geskryf moes wees en nie reeds elders geplaas was nie.
Temas vir marathon gedig:
Week 1 en 2
Ons liefde vir Afrikaans
en wat dit vir ons beteken
Week 3 en 4
Pret in Afrikaans.
Lekker lig tot selfs laf
Week 5 en 6
Diep uit die hart
soos ek voel
Week 7 en 8
Ons toer in Afrikaans
deur SA bv Karoo, Kus, Laeveld
Week 9 en 10
Die vreugdes in my lewe
bv. werk/stokperdjie/liefde en
dankbaarheid/skryf/dig
Week 11 en 12
Die pad vorentoe met Afrikaans
