Gister middag kry ons 'n oproep van meisiekind. Hulle wil ons kom sien. In die lig gesien, van al die negatiewe goed wat die laaste tyd met ons gebeur het, krimp ons harte inmekaar en kan nie wag dat die tyd aanbreek nie.
Toe hulle instap is die agent van die konstuksiefirma wat verantwoordelik is vir die waterskade hier. Ons "shoe-shoe" hom by die deur uit.
Vra ek vir skoonseun hoekom is sy bakkies so dik, wat is fout. Nee, hy is net moeg, het 'n lang dag gehad.
Kom-kom, vertel, wat is aan die gang.
Ons meisiekind het haar werk in Dubai verloor toe die firma gesluit het. (Sy en Henk het vir dieselfde firma gewerk.) Sederdien was sy werkloos.
Met 'n lang storie, (ek moes haar kort-kort aanpor om tog net by die punt te kom) vertel sy dat sy die advertensie gesien het vir 'n PA vir iemand by 'n gholfklub. Toe sy daar kom raap die eerste persoon wat haar te woord staan haar op. Hy dink sy sal baie beter vaar as 'n "club fitter" en as sy wil, sal hy haar stuur vir 'n twee jaar kursus om die tegniek onder die knie te kry. (Dit is seker nou onder die "staalknie" want sy het mos twee knievervangings gehad.
)
Hy stem saam met haar dat gholf in SA die dames liederlik afskeep en sy word gevra om die klerereeks-aankope te behartig.
Om 'n lang storie kort te maak, my meisiekind is in haar element. Dit is wat sy graag wil doen en soos ek haar ken, weet ek dat sy 'n reuse sukses daarvan sal maak.
Uit my hart uit wens ek dat elkeen van julle wat nie gelukkig is in dit wat julle doen nie, of nog volstoom aan die werksoek is, binnekort julle suksesverhale hier sal kom skryf.
