Vandag kom gee ek raad aan die jonger geslag, en dit is enige een jonger as so 58 jaar. Ek dink ek kan met gesag praat na 'n saamwees van 40 jaar en huwelik van 36 jaar.
WAT HOU 'N HUWELIK STAANDE EN GELUKKIG?
Is dit aardskuddende seks?
Is dit hope en hope geld en sekuriteit?
Is dit twee perfekte mense wat nooit foute maak nie en soos 'n seilskip sonder enige wind van voor of storms voortseil op 'n spieelgladde oseaan?
Is dit as jy so gelukkig was om jou 'sielemaat' te kon ontmoet, en trou, en op 'n wit perd in die ondergaande son weggalop het om te 'happy ever after'?
NEE. Nie een van die belaglike redes hierbo waarom mense gewoonlik idealiseer vir 'n 'gelukkige huwelik' nie.
Dit is die klein dingetjies wat mens gelukkig maak en soos gom aanmekaar vasbind. Dit is die KLEIN herinneringe wat mens saambou, wat mens op 'n stil oomblik by jouself laat glimlag en maak dat jy nie kan wag dat julle weer saam is nie. Soms kleine beuselagtige dingetjies, wat vir ander na trivia sal lyk.
Soos julle tweetjies saam wat vir 'n hele dag lank in die kombuis saam werskaf, sop maak en beskuit bak, en die interaksie daarvan en die harmonie van twee lywe wat in een klein kombuisie saam werskaf sonder wrywing, en bakkend en brouend diep hartsgevoelens blootle.
Dit is soms net maar in die kyk in die oog, die lag en die traan, die lief en die leed. Dit is soms juis die storms ter see wat bind. Liggaamlike deel is belangrik ja, maar is nie wat ewig bind nie. Geld en sekuriteit maak natuurlik vir almal die lewe makliker, maar soms bring juis dit wrywing en ongeluk, soms is ontbering daarvan juis hardelym.
Foute kan vergewe word. En as mens vergewe, moet dit vergewe, en vergeet wees. Vergewe is nie om dit te begrawe tot die volgende woordewisseling nie. Vergewe is soos om 'n geliefde te begrawe. Dis permanent. Niemand wil tog ooit weer 'n ontbindende lyk opgrawe nie, al verlang jy hoe na daardie persoon. Dis net te grusaam.
Die teorie oor die 'sielsmaat' is geweldig over-rated. Wat is nou jou sielsmaat? Een wat presies dieselfde belangstellings het? Een wat jou nooit kritiseer en foute in jou raaksien en uitlig nie? Een wat jou gelukkig maak? (Mens is vir jou EIE geluk verantwoordelik)
Jou sielsmaat is die een met wie jy 'n eie, unieke geskiedenis bou. Dit is daardie einste geskiedenis, met al sy positiewe en negatiewe, met al sy goed en sleg, wat maak dat jy op 'n dag dat jy so woedend is dat jy gerus moord kan pleeg of jou tasse wil pak, besin, en weer probeer .... en weer.... en weer....
'n Gelukkige huwelik bestaan uit jare en jare se oomblikke. Oomblikke van intense geluk. Oomblikke van ekstase. Oomblikke van wrewel. Oomblikke van alleen voel. Oomblikke van kritiek. Oomblikke van hartsgoed deel. Oomblikke van saam lag, saam hartbreek, mylpale wat saam geleef word. En dan, op 'n dag, kyk jy terug en besef hoe baie geskiedenis daar saam is, en dat dit net onmoontlik sou wees om jou rug daarop te moet keer.
'n Gelukkige huwelik is 'n WILSBESLUIT. Dit is nie 'n GEVOEL nie. En alhoewel dit nie die taak van die lewensmaat is om jou gelukkig te maak nie, maak dit JOU baie gelukkig wanneer jy dit jou taak ag om daardie maat gelukkig te maak.
