Woorde

[PM]

                                               Woorde

                                              Is water
                            wat in dun straaltjies ontspring,
                        om op te bou in golwe wat oorstort en
                                       verander in riviere
            wat vaartuie wegvoer na plekke van ongekende vreugde,
             om uit te kring tot by die monding van ontvanklikheid,
                              ver  bokant my begrip verhewe.
                                      Dis ‘n magtige krag
                                       wat my siel voed,
                                           my dors les,
                           die eb en vloed van my bestaan is.
                        Die hartklop van my handel en wandel.
                                            Dit gee lewe,
                                             bring groei,
                                versadig my dors na kennis,
                                   benat my droë aarde en
                                  kenter  dit tot sublimiteit.           
                          Woorde is ‘n beleë volronde rooiwyn
                  wat met die tyd ryp word en tot wasdom bloei.

[adele]

     Woorde is 'n beleë volronde rooiwyn
                  wat met die tyd ryp word en tot wasdom bloei.

[PM]

Soms verwonder ek my aan waar die "gedagtes" vandaan kom.  Soms is die woorde soos 'n teepottuit, dit "skink" sommer vanself. 

[adele]

Dis waar, vriendin, ek het al verstom gesit wanneer ek iets griffel, en woorde rym en ritme sommer in plek, of 'n volgende gedagte kom aangestap om iets af te rond, net wanneer ek al moed opgegee het. Daarom sê ek meeste van my woorde en afronding kom van Bo af.

[Meraai vannie Baai]

Soms wanneer die ABC so ingespan word, ontbreek woorde my en moet ek staat maak op prentjies... 

[PM]

   Ek hou van jou prentjies Raaitjie.