Hierdie week was nou weer een van daardie weke wat maar swaar was op die swem-vlerkies van my torre. Dit is nou die einde van die week en ek het nog net genoeg heel vlerkies oor vir die helfte van my torre. Die gevolg is dat my breinselle nou 'n ernstige besige taak het om die klomp torre te skeduleer sodat daar nie 'n tor uitgaan op 'n kurkprop sonder sy vlerkies nie.
Die manne moet maar staan en wag tot daar 'n tor terugkom sodat hy sy vlerkies kan aansit en uitgaan.
As jy dalk nou wonder wat ek so aangaan oor torre en vlierkies, laat ek net gou verduidelik hoe dinge regtig werk hier in jou kop. Op skool leer ons dat die brein 'n massa van senuwee selle is, maar hulle vertel ons nooit van die heel belangrikste deel in die brein nie, dit word 'n groot gehiem gehou.
Sien, in die middel van die brein, is die beheer sentrale. Dit is waar alles beheer word wat jy doen en dit word alles beheer deur 'n klomp torre wat op kurkproppe rondvaar op 'n dam. Bokant die dam is 'n groot koepel en van die koepel hang 'n klomp toue en elke tou is vasgemaak aan 'n skakelaar wat 'n sekere deel van die brein beheer.
As mens dink, dan gaan die torre uit op die dam op hulle proppe en trek die regte toue in die regte volgorde om die inligting in jou brein deur die regte kanale te laat vloei, sodat jy by 'n antwoord kan uitkom.
Soms gebeur dit dat die dam bietjie stormagtig word en dan sukkel die torre om by die regte toue betyds uit te kom, of hulle val soms af in die water en moet dan gered word deur ander torre naby hulle. Dit veroorsaak dan natuurlik dat die hele dink proses stadig word en ons kom dan voor as dom.
Niemand is regtig dom nie, party mense het net minder torre as ander of die torre is bietjie lui of hulle val te veel van die proppe af, dan word die hele dink proses vertraag.
Die torre word natuurlik met basiese uitrusting toegerus, soos swem-vlertjies, sodat as hulle afval, dan kan hulle maklik weer terugklim op die prop en voortgaan met toutjies trek. Dit gebreur natuurlik dat die vlerkies afblaas en dan moet dit weer opgeblaas word, maar as dinge bietjie druk gaan, dan kry die torre van die vlerkie-opblaas afdeling nie genoeg tyd om al die vlerkies weer op te blaas nie met die gevolg dat al hoe minder torre gelyktydig kan uitgaan op die proppe, wat ook die dink proses verstadig.
Nou is daar natuurlik mense wat bevoorreg is om hulle torre te kan uitrus met meer gevorderde uitrusting, soos klein motorbote in plaas van die proppe en duik uitrusting of lewens baadjies, wat maak dat hulle produktiwiteit nie so baie geraak word as hulle in die water beland nie. Iemand soos Albert Einstein het seker motorbote met veilighieds gordels en duikpakke en lewens baadjies gehad vir sy torre. En hulle was baie paraat.
Ek het maar die standaard uitrusting vir my torre; kurkproppe en swem vlertjies en een opblaas eendjie wat om die lyf gaan vir noodgevalle. Dus gebeur dit gereeld dat my torre nie genoeg vlertjies het nie en moeg raak en val dan meer gereeld in die water en moet mekaar help om weer op die proppe te kom. Dit is wanneer ek nie meer altyd reageer soos verwag nie. Byvoorbeeld soos wanneer my vrou met my praat en ek besef eers 'n minuut of twee later dat sy gepraat het en wat sy gese het. Partykeer spartel die die tor wat die inligting van my oor af moet verkwerk nog in die water rond en sy notas raak nat, dan weet ek nooit heeltemal wat sy gese het nie en moet ek probeer om uit te werk wat sy gese het - ek kry dit gewoonlik verkeerd.
Nou ja, soos ek gese het, vandag is ek weer laag op vlerkies. Nou net 'n epos gestuur sonder die aanhegtings...
