My Kruispad

[adele]

Op my lydensweg
het ek vandag gestap
kop omhoog
selfvoldaan     hooghartig
met kosmosvelde rondom my voete
     ongeërg     
          oorhaastig...
gemaklik in my ego
vol selfvoldane eie-oordeel

Gou het die pad versteil
hoër-op aan my kuite gevreet
ek kon skaars sien
hoe geknakte stingels
hulself uit die son uit vergeet

Later elke tree geworstel     
verstik in die stof van my gewete
gestruikel     geval
oor die rotse van selfverwyt
my vingers gebreek

In ondraaglike hitte
het beskuldigings
korrupsie     begeertes
oneer     losbandige dae
vasgegésel in my siel
      oopgebars
           my in stukke gemérgel

          Laatmiddag geswik
               sononder oor die eindstreep gekruip
                    gebroke my voorkop
               in die traan-modder wou afkoel
                    en vir laas wanhopig
                         na die droë horison roep

Toe     drie kruispale verrys
           die kimlyn verbreek
         'n Stem uit die woestyn
       soos 'n koelte oor my waai
             'hier het Ek alles
                vir jou gedra'

Ek waggel orent
tot my knieë weer knak
berou drup oor my hande
maar vreugde droog my wange
dankbaar lig my hande vanself
onverganklike
      vergifnis
          het al die pad vir my voltooi!

   

[Angelica]

Asemrowend, Adele.

[Meraai vannie Baai]

Pragtig mater. Unieke samestelling van jou woordsteenformasie 

[PM]

Ek weet wanneer ek koue rillings kry, dat die gedig met my praat.
Ek beleef jou "pad na bo" met hoor, sien, voel en ruik en ek hoop   verstaan!
Dit is uitstekend gedoen.    

[Ah Willa]

ek het nie woorde nie ... WOW is al wat wil uitpop ...

dis diep en raak mens op die verste hoekies van die hart aan - daai hoekies waar mens  niemand heen wil laat gaan nie ...

baie mooi

[PM]

Ek het net gou weer kom lees.  Dit is werklik 'n goeie gedig en vernuftig geskryf Adelé! 

[adele]

dankie julle wonderlike manse, ek koester elkeen se bydrae.
wens ek kan vertel hoe hierdie woorde gegriffel is, dit was een vd wonderlikste ure, die eerste woorde wat in my kop gekom het en hoe elke ekstra gedagte in plek geval het.

[PM]

Dit gebeur soms nê, dan is dit die pragtigste gedig!
Hierdie een is ook beslis deel van boek twee.  Ek het in boek twee ook van jou ander werk wat oorgestaan het van boek een af.  Dink jy Walter sal ook weer wil deelneem?

[adele]

hi more lief vriendin

is reg, jy kan dit plaas en die ander twee ook, kannie onthou watter twee nie, maar hou dit seblief net twee bladsye. gaan jy dit weer met foto-agtergrond plaas? dan sal ek van my foto's wat pas vir jou stuur. gee die name van die 2 griffels wat jy nog gekies het.
Walter sit eers uit met hierdie rondte.

[PM]

Maak so matertjie.  Gaan net eers gou dorp toe en dan kom ek vir jou die inligting deurgee.