Die Afrikaanse Forum

Kom skryf saam in jou eie plekkie => Kom deel jou woordwerke => Elsabe => Topic started by: Elsabe Oosthuizen on July 13, 2015, 01:55:10 PM

Title: Die mooi kant
Post by: Elsabe Oosthuizen on July 13, 2015, 01:55:10 PM

Langs die pad .....
waar berge gister se storie vertel
aalwyne vuur in die son vertoon
die oggendou vrygewig verloën

Langs die pad .....
waar poppelierbome in gelit
naby die spruit
hul dorstigheid verdrink

Langs die pad .....
kom wintersonnetjie
saggies oor die aarde streel
die wind in ysige vingers fluister

Langs die pad .....
lê herfsblare
in grondgedagtekleur
gelate oor die landskap
die lelik se mooi kant
om jou op te beur

Langs die pad .....
waar die môre se lente
nuwe lewe   
net oor die bultjie vir jou sal gee

Title: Re: Die mooi kant
Post by: Anastasia on July 13, 2015, 04:07:27 PM

Hierdie is pragtige positiewe woorde wat jy aanmekaar gestring het om so lieflike gedig te ryg.  Ek het dit geniet, die gedig lees so lig en vrolik.

Title: Re: Die mooi kant
Post by: Angelica on July 13, 2015, 06:39:29 PM

Baie mooi..

Title: Re: Die mooi kant
Post by: Meraai vannie Baai on July 13, 2015, 10:48:42 PM

Lief lief die gestringde sinne (pragtige uitdrukking Anastasia) waarmee Elle vir ons die rustigheid van die toneel weergee. Hierdie ene smeek vir hardop voorlees. Ek sal enige tyd my stoeltjie nadersleep en vra vir nog!