Die Afrikaanse Forum

Kom skryf saam in jou eie plekkie => Kom deel jou woordwerke => Gawelina se plek => Topic started by: Gawelina on December 31, 2012, 07:25:01 PM

Title: Ode aan die ou jaar
Post by: Gawelina on December 31, 2012, 07:25:01 PM

Ek het gesien hoe jy
soos water deur my vingers glip
en in  dorre grond verdwyn.
Stom het ek na die kol gestaar
tot 'n wit son als verdroog
en niks  meer jou naam kon spel.

Op 'n droë kluit plaas ek 'n spierwit roos
as grafsteen van dit  wat was,
gooi vingerskadu's oor my oë
en soek die toekoms op die horison.

Jy is verlede tyd,
die hede net 'n oomblik lank,
want in die toekoms wag 'n nuwe dag,
'n nuwe avontuur en 'n nuwe hy.

Title: Re: Ode aan die ou jaar
Post by: Meraai vannie Baai on January 01, 2013, 02:03:51 AM

Elke keer as ek jou liefde tussen lyne lees, wens ek dat daar 'n manier was wat ek myself so kon uitdruk as dit by die grootste seeninge kom: die brandende vlam van die liefde  :love7: :love7: Ek sal hierdie graag in die woordskuur wil bewaar as 'n uitstekende voorbeeld van 'n enkele 'witspasie' wat boekdele spreek  :book1: :icon_salut:

Title: Re: Ode aan die ou jaar
Post by: Fransi on January 01, 2013, 08:44:57 AM

Pragtig geskryf.

Title: Re: Ode aan die ou jaar
Post by: PM on January 05, 2013, 05:48:57 AM

gooi vingerskadu's oor my oë
en soek die toekoms op die horison

Dit is werklik baie mooi.  Dit moet boek toe.  Ek lief die titel, daarsonder sou die gedig 'n heel ander dimensie gehad het.