Na aanleiding van Chris Chameleon se brief aan die seun wat op skoolgronde deur ander kinders geboelie is.
Toe ek hierdie lees, onthou ek van Hannes M, uit my Fanie Malan-dae (6 jaar oud) op Upington. Hy het my elke dag met sy vuiste bygekom as ons van die skool af huis toe loop. My voorgelê. Ek het altyd gedrentel tot ek gedink het hy is al op die brug, maar hy was elke dag klokslag op sy pos. eendag het van die groter kinders hom gevra of sy pa sy ma slaan en daarom doen hy dit aan my. Sy antwoord was ja, sy pa slaan sy ma, MAAR dis my ouma (Bredenhann) wat elke keer die polisie bel en sy pa laat toesluit. Hulle en my ouma-hulle was bure. Hy het saam met sy ouers by sy ouma-hulle gebly en sy ouma het elke keer na my ouma toe gehardloop en self die polisie van my ouma af gebel.
Op Kathu het ek hom weer raakgeloop op die skoolgronde. Dit was sy eerste dag in die nuwe skool. Ons was graad 7. Ek en Esna het voor hom gestaan, ek het gevra: “Kan jy my onthou?” Toe hy “Ja” antwoord, skop ek hom op sy maermerrie, het hoër gemik, maar my babydolls wou nie nat word nie en vir hom gesê: “As jy weer jou hande vir my lig, blik*** Dana vir jou!” (Dana was my suster se boyfriend en hy en sy broers se name het hulle vooruitgesnel.) Hannes het nooit weer met my skoor gesoek nie. My wraggies gevra om te kys!!! (Nee ek wou hom nie vir ‘n halfsent gehad het nie).
Maar Laerskool Kathu had ek nog ‘n boelie gehad. Hy het my nie met geweld geboelie nie. Hy het sy tong gebruik. Leuens vertel en ek moes die spit afbyt. Sy handlanger speel, (as dit nie vir hom en sy afpersing was nie, sou ek nooit geweet het ek kan teken en opstelle skryf nie). Hy was die onderwysers se blue eyed boytjie. Sy pa was mynkaptein.
Eendag tydens bybelperiode laat val my vriendin haar uitveer en dit hop tot teen my voet. Ek tel dit op en sit dit op die bank neer, die onnie was besig om te bid. Toe die onnie klaar Amen sê, leun ek oor die paadjie tussen die banke om haar uitveer terug te gee. Toe die trit klipgard skree: "Juffrou sy het Linda se uitveer gesteel!" Maak nie saak hoe Linda verduidelik of ek nie, hy het voet by stuk gehou. Die juffrou het hom in die bek geruk en hom uitgevreet oor hy nie sy oë gesluit het tydens gebed nie.
Ek het hom op Menlo Park Hoër weer gesien. In die biblioteek. Hy het pouses en LO periodes daar deurgebring.Toe was hy ‘n mak mannetjie, want sien, hy word toe geboelie deur ander kinders. Ons twee het mekaar geselskap gehou want ek kon nooit my klasse in daardie groot skool kry nie. Die biblioteek was ook nader aan die hek en Jacques ‘n goeie “onnie”.
Kathu Hoërskool het ook sy boelie gehad. Emile, die onderwyser het hom ook op sy plek gesit. Eendag sien ek op TV hy is ‘n sersant in die polisie, Tembisa polisiestasie, en hy behandel would be kriminele nes hy ons meisiekinders geboelie het. Hy word nou Mielie genoem.
©Orange Blue
©ALLE REGTE VOORBEHOU Geen gedeelte van hierdie skrywe mag op enige manier gereproduseer word sonder die skriftelike toestemming van die kopiehouer (skrywer) en uitgewer nie